වෙසක් පෝයට අමද්‍යප සතිය ප්‍රායෝගිකව ක්‍රියාත්මක කරමුද?

       මෙවර වෙසක් පෝය නිමිත්තෙන් 2012 මැයි මස 03 වෙන දින සිට මැයි 09 දින දක්වා අමද්‍යප සතියක් ක්‍රියාත්මක කිරීමට සෞඛ්‍ය අමාත්‍යාංශය විසින් ප්‍රකාශයට පත්කර ඇත. ඒ මතින් තොර නිවහනක් යන තේමාව යටතේයි. මෙමගින් වෙසක් දිනයන් තුල ජනතාව මත්පැනින් ඈත් කිරීම රජයේ අරමුණ වන්නට ඇත. මා මේ ලිපිය ලියන්නේ ඒ අරමුණ සාක්ෂාත් කරගැනීමට ගතයුතු පියවරයන් මොනවාද? යන්න සාකච්ඡා කිරීමටයි.

පලමුවෙන්ම කිව යුත්තේ රජය මගින් මෙවැනි වැඩ පිළිවෙලවල් සතියකට පමණක් ක්‍රියාත්මක කිරීම මගින් ලංකාවේ මත්පැන් භාවිතා කරන්නන් සුමගට ගැනීමට උත්සාහ දරනවා නම් එම ප්‍රයත්නය අසාර්ථක බවයි. සිදුකළ යුත්තේ අඛන්ඩවම මත්පැන් භාවිතාව අඩුකරවන ක්‍රියාදාමයන් ක්‍රියාත්මක කිරීමයි. නමුත් රජය විසින් කරන්නාවු මේ කර්තව්‍යත් ඒ සඳහා කිසියම් මුලාරම්භයක් නිසා අප එය අගය කරමු.

බොහෝ විට මත්පැන් විකුණන්නට තහනම් දිනයන්ට පෙරදිනයන් හි සිදුවන්නේ මත්පැන් හල් වල අලෙවිය කිහිප ගුණයකින් වැඩි වීමයි. ජනතාව මත්පැනින් වලක්වා ගැනීමට රජයට පැහැදිලිවම උවමනාවක් තිබෙනවා නම් වෙසක් සතියට කලින් සතියේ මත්පැන් අලෙවියට සීමා පැනවිය යුතුය. එමෙන්ම අප රට තුල නීතිවිරෝධීව මත්පැන් සිල්ලරට නිවෙසේ සිට විකුණන බොහෝ දෙනෙක් ඇත. මේ අය වෙසක් සතියට කලින් සතියේ බඩු ගබඩා හෙවත් Stock කර ගනිති. මත්පැන් හල් වල පොලිස් නිලධාරීන් යොදවා මේ දිනවල වැඩියෙන් මත්පැන් බෝතල් මිලට ගන්නන්ව වැලැක්විය යුතුය.

සමහර විට ඔවුන් විසින් තමන්ගේ නිවසේ සාදයක් තිබෙන නිසා මත්පැන් අවශ්‍ය යැයි කියන්නට පුළුවන. මෙහිදී රජය මගින් වෙසක් සතිය තුල මත්පැන් සාද තහනම් කළ යුතුය. දෙදෙනෙකු තුන්දෙනෙක් රැස්ව නිවෙස් වල තිබෙන මත්පැන් සමග සාමීචි තහනම් කළ යුතුය. එවිට නීති විරෝධී සිල්ලර වෙලඳුන්ට එමගින් වැට බැ‍දෙනු ඇත. එමෙන්ම මෙම නීති නිසිලෙස ක්‍රියාත්මක වේදැයි සතිය තුල පොලීසිය විසින් විශේෂ වැටලීම් ක්‍රියාත්මක කළ යුතුය. මෙහිදී කිව යුතු තවත් කරුණක් නම් නීති විරෝධී සිල්ලර අලෙවි කරුවන්ට සහය දක්වන්නේ මත්පැන් හල් අලෙවි කරුවන්මය. මෙම සතිය තුලදී මත්පැන් හල් වලින් රහසිගතව පිට නොවන ලෙස සීල් තැබීම වඩාත් සුදුසුය.  

එමෙන්ම වෙසක් බලන්නට කියමින් රාත්‍රී කාලයේ මත්පැන් බී පාරේ විවිධ අකටයුතුකම් කරන්නන් අල්ලා වෙසක් සතිය තුල ඔවුන් රිමාන්ඩ් භාරයේ තබන්නේ නම් එය ඔවුන්ගේ ජීවිත වල අමතක නොවන සිදුවීමක් වනු ඇති සේම යළිත් කිසි දිනෙක ඔවුන් එලෙස ක්‍රියා නොකරනු ඇති.

මෙම ලිපිය කියවීම ගැන මාගේ ස්තුතිය ප්‍රකාශ කරන අතරම මේ ලිපිය සම්බන්දව ඔබට සිතෙන දේ පහත ප්‍රකාශ කරන මෙන් ඉතා කරුණාවෙන් ඔබගෙන් ඉල්ලා සිටිමි. ඔබගේ අදහස් මම ඉතා අගය කොට සලකන අතර ඉදිරි ලිපි වලට එය මට මහත් රුකුලක් වනු ඇත. මෙයට (කතෘ සජිත් දිල්හාන්)